ជំងឺតាឡាសសេមី (Thalassemia)

តាឡាសសេមី គឺជាជំងឺមួយក្រុមដែលធ្វើឲ្យខ្លួនមនុស្សយើងមិនអាចផលិតឈាមដែលមានគុណភាពខ្ពស់ ឲ្យមានបរិមាណគ្រប់គ្រាន់ ។ មានជនជាតិខ្មែរជាច្រើនកើតមកមានជំងឺនេះតាំងពីកំណើត ។ ជំងឺនេះចម្លងពីឪពុកម្តាយទៅកូនតាមរយៈហ្សែនតំណពូជ ។ វាមិនឆ្លងតាមឈាម ខ្យល់ ទឹក ឬតាមរយៈការប៉ះពាល់ ឬការរួមភេទជាមួយអ្នកដែលមានជំងឺនេះទេ ។ វាក៏មិនបណ្តាលមកពីការខ្វះចំណីអាហារ ឬការខ្វះអនាម័យដែរ ។

តាមធម្មតា អ្នកដែលមានជំងឺតាឡាសសេមី មានសភាពធម្មតា និងអាចមានជីវិតរស់នៅដូចធម្មតា ។ ប៉ុន្តែទោះជាយ៉ាងនេះក៏ដោយ នៅពេលគេធ្វើការវិភាគឈាម គេឃើញកម្រិតគោលិកាឈាមក្រហមទាបជាងធម្មតា (9-11g/dl) ។

ដើម្បីឲ្យដឹងថានរណាម្នាក់មានជំងឺតាឡាសសេមី អ្វីដែលត្រូវធ្វើជាពិសេស គឺការពិនិត្យមើលគោលិកាឈាមក្រហម ។

ការព្យាបាល

ជាទូទៅជំងឺតាឡាសសេមី មិនត្រូវការព្យាបាលទេ ។ ថ្នាំពេទ្យដូចជាថ្នាំជាតិដែក ឬការចាក់បញ្ចូលឈាម មិនអាចជួយបានដែរ និងមានគ្រោះថ្នាក់ផង ។ តែទោះយ៉ាងណាក៏ដោយ ប្រសិនបើកុមារដែលមានជំងឺនេះមានសភាពធ្ងន់ធ្ងរ កុមារនឹងមិនធំធាត់ លូតកំពស់បានល្អ និងធ្វើឲ្យមានបញ្ហាសុខភាពផ្សេងៗទៀត ។ ជំងឺនេះត្រូវការការពិនិត្យ និងព្យាបាលដោយវេជ្ជបណ្ឌិតជំនាញ ។

ដកស្រង់ចេញពីសៀវភៅទីណាគ្មានវេជ្ជបណ្ឌិត សំរាប់ការថែទាំសុខភាពជនបទ