ជំងឺភ្នែកឡើងបាយ
ជាធម្មតាកែវភ្នែកមនុស្សយើងមានលក្ខណៈថ្លា ដែលអនុញ្ញាតឲ្យកាំពន្លឺរូបភាពឆ្លងកាត់ដល់សសៃរ៉េទីនទើបធ្វើឲ្យយើងអាចមើលឃើញរូបភាពនានាបានច្បាស់ ។ ជំងឺភ្នែកឡើងបាយ គឺជាការស្រអាប់កែវភ្នែកដែលបណ្តាលមកពីជរាភាព និងជំងឺ ឬមូលហេតុផ្សេងៗ ជាហេតុធ្វើឲ្យការមើលឃើញថយចុះ ។
ប្រភេទភ្នែកឡើងបាយ
- ភ្នែកឡើងបាយមនុស្សចាស់ ៖ មនុស្សគ្រប់រូបចាប់ពីអាយុ ៤៥ឆ្នាំឡើងទៅ អាចជួបប្រទះនឹងជំងឺភ្នែកឡើងបាយដែលបណ្តាលមកពីស្រអាប់កែវភ្នែក ដោយជរាភាព ។
- ភ្នែកឡើងបាយពីកំណើត និងកុមារភាព ដែលបណ្តាលមកពី
- តំណរពូជ
- ម្តាយមានជំងឺស្អូច (Rubella) ក្នុងកំឡុងពេលមានគភ៌
- ការប្រើប្រាស់ថ្នាំ មានសារធាតុស្តេរ៉ូអ៊ីតរយៈពេលយូរពេលមានផ្ទៃពោះ
- ការប៉ះទង្គិច ឬរបួសភ្នែកដោយគ្រោះថ្នាក់
- ការប្រើប្រាស់ថ្នាំមានសារជាតិស្តេរ៉ូអ៊ីតដោយពុំមានការត្រួតពិនិត្យ
ភ្នែកឡើងបាយដែលបណ្តាលមកពីការប៉ះទង្គិច
ការប៉ះទង្គិច ឬរបួសគ្រាប់ភ្នែក ឬរលាកដោយសារជាតិគីមី អាចបណ្តាលឲ្យ កើតជំងឺភ្នែកឡើងបាយ ចំពោះមនុស្សគ្រប់វ័យ ។
ភ្នែកឡើងបាយបណ្តាលមកពីជំងឺភ្នែកនានា
អ្នកដែលមានជំងឺផ្សេងៗដូចជា
- ជំងឺទឹកដក់ក្នុងភ្នែក
- រលាកប្រស្រីភ្នែក និងជំងឺទឹកនោមផ្អែមជាដើមអាចបណ្តាលឲ្យភ្នែកឡឡើងបាយយ៉ាងឆាប់រហ័ស
ភ្នែកឡើងបាយបណ្តាលមកពីការប្រើប្រាស់ថ្នាំ
ការប្រើប្រាស់ថ្នាំដំណក់ ឬថ្នាំលេបប្រភេទស្តេរ៉ូអ៊ីតយូរអាចបណ្តាលអោយកើតជំងឺភ្នែកឡើងបាយផងដែរ ។
រោគសញ្ញា
- ចាញ់ពន្លឺ
- ពេលថ្ងៃស្រវាំងខ្លាំង ពេលល្ងាចស្រឡះ
- កូនក្រមុំភ្នែកឡើងស និងពុំមានការឈឺចាប់ គំហើញថយចុះបន្តិចម្តងៗ រហូតឃើញតែពន្លឺ
តើការវះកាត់ភ្នែកឡើងបាយអាចមានផលវិបាកអ្វីខ្លះ ?
ការវះកាត់ភ្នែកឡើងបាយគឺជាប្រភេទនៃការវះកាត់ជំងឺភ្នែកច្រើនបំផុត ។ ហើយជាធម្មតាការវះកាត់ភ្នែកឡើងបាយនេះ ៩០% ពុំមានផលវិបាកអ្វីឡើយ ក្រោយពីការវះកាត់ រួចហើយគំហើយអ្នកជំងឺមានភាពប្រសើរឡើងវិញ ធ្វើអោយអ្នកជំងឺពេញចិត្ត ទៅនឹងលទ្ធផលដែលទទួលបាន ។ ទោះជាយ៉ាងណាក៏ដោយ ការវះកាត់ក៏អាចមានផលវិបកតិចតួច ទោះបីជាការវះកាត់នោះត្រូវបានធ្វើឡើងដោយ គ្រូពេទ្យដែលមានបទពិសោធន៍យូរឆ្នាំហើយក៏ដោយ ។ ហេតុដូច្នេះហើយអ្នកជំងឺត្រូវយល់ដឹងពីផលវិបាកដែលអាចកើតមានឡើងក្រោយពីការវះកាត់ភ្នែកឡើងបាយមុននឹងសម្រេចអោយគ្រូពេទ្យធ្វើការវះកាត់ ។
- ភ្នែករលាកខ្ទុះក្រោយការវះកាត់ ៖ នេះជាផលវិបាកធ្ងន់ធ្ងរបំផុត ហើយអាចធ្វើអោយអ្នកជំងឺបាត់បង់គំហើយ ឬពិការភ្នែក គេសង្កេតឃើញផលវិបាកនេះ កើតមានឡើងចាប់ពី ៣ទៅ២១ថ្ងៃ ក្រោយពីការវះកាត់ រោគសញ្ញាដំបូង គឺអ្នកជំងឺមានការឈឺចុកចាប់ខ្លាំងនៅក្នុងគ្រាប់ភ្នែកខ្លាចពន្លឺថ្ងៃ គំហើយធ្លាក់ចុះយ៉ាងខ្លាំងហើយភ្នែកក្រហម និងហើមបើសិនជាអ្នកជំងឺជួបប្រទះបញ្ហាខាងលើ ត្រូវប្រញាប់មកជួប គ្រូពេទ្យឯកទេសជាបន្ទាន់ និងអោយបានទាន់ពេលវេលា ដើម្បីធ្វើការព្យាបាល ។
- ហើមសសៃបាតភ្នែកមានសណ្ឋានជាគីស ៖ នៅក្នុងផ្នែកកណ្តាលនៃសសៃរ៉េទីនមានកន្លែងសំខាន់មួយឈ្មោះថា Macular ដែលមានតួនាទីធ្វើអោយឃើញឆ្ងាយ ។
ការព្យាបាល
- ការវះកាត់ ឬបកយកបាយភ្នែគ (កែវភ្នែកដែលស្រអាប់) ចេញគឺជាជម្រើសតែមួយគត់សម្រាប់ការព្យាបាលជំងឺភ្នែកឡើងបាយនិងអាចធ្វើអោយភ្នែកអ្នកជំងឺភ្លឺឡើងវិញបាន ។
- ការវះកាត់អាចធ្វើឡើងយ៉ាងសាមញ្ញបន្ទាប់ពីបានពិនិត្យដោយឧបករណ៍ចក្ខុសាស្ត្រនានា នៅតាមមន្ទីរពេទ្យភ្នែកដោយគ្រូពេទ្យឯកទេសចក្ខុរោគ ។ ក្រោយពីការវះកាត់បកយកបាយភ្នែកចេញហើយ គេប្រើប្រាស់កែវសិប្បនិម្មិត ជំនួសកែវភ្នែក ដើម្បីអោយអ្នកជំងឺអាចមើលឃើញឡើងវិញ ។ ការវះកាត់ពុំមានការឈឺចាប់ទេ និងចំណាយពេលតែ ១៥ទៅ២០នាទីប៉ុណ្ណោះ ។
- ការវះកាត់ ឬបកយកបាយភ្នែកចេញជាជម្រើសតែមួយគត់ក្នុងការព្យាបាលភ្នែកឡើងបាយគ្រប់ប្រភេទ ។
- ការវះកាត់ភ្នែកឡើងបាយទាន់ពេលវេលា អាចជួយសង្គ្រោះគំហើយញរបស់អ្នកជំងឺឲ្យបានប្រសើរឡើងវិញ ។
- ពុំមានឱសថ ឬថ្នាំដំណក់ណាដែលអាចជួយព្យាបាលភ្នែកឡើងបាយបានទេ ។
- ចំពោះកុមារដែលមានជំងឺភ្នែកឡើងបាយ ត្រូវរួសរាន់មកព្យាបាលនៅមន្ទីរពេទ្យភ្នែក ។
- ការប្រើប្រាស់ថ្នាំ ឬវ៉ែនតាពុំអាចជួយព្យាបាលជំងឺភ្នែកឡើងបាយបានទេ ។
- អ្នកជំងឺត្រូវអនុវត្តតាមការណែនាំជាចាំបាច់របស់គ្រូពេទ្យ បន្ទាប់ពីការវះកាត់ដើម្បីជៀសវាងនូវផលវិបាកផ្សេងៗ ដែលអាចកើតមានដោយយថាហេតុ ។
ដកស្រង់ពី ទស្សនាវដ្តីសុខភាពភ្នែក ចេញផ្សាយដោយសមាគមគ្រូពេទ្យភ្នែកកម្ពុជា ២០១១
&via=stc_network)
0 comments:
Post a Comment