ទម្លាប់ដែលប៉ះពាល់ដល់សុខភាព

ទម្លាប់មួយចំនួនដែលប្រជាជនប្រកាន់យក មិនត្រឹមតែបំផ្លាញសុខភាពផ្ទាល់ខ្លួនទេ ថែមទាំងផ្តល់គ្រោះថ្នាក់ដល់អ្នកនៅជុំវិញ ដោយផ្ទាល់ឬដោយប្រយោល ។ ទម្លាប់ទាំងនោះ ភាគច្រើនអាចបញ្ឈប់ ឬជៀសវាងបាន ប៉ុន្តែជំហានដំបូង គឺត្រូវយល់ថា ហេតុអ្វីបានជាជាការបញ្ឈប់ទម្លាប់ទាំងអស់នោះមានសារសំខាន់ ។

ការផឹកស្រា

បើស្រានាំមកនូវក្តីសប្បាយដល់អ្នកផឹក នោះវាក៏នាំមកនូវសេចក្តីទុកផងដែរ ជាពិសេសចំពោះក្រុមគ្រួសាររបស់អ្នកផឹកនោះ ។ ការផឹកស្រាវបន្តិចបន្តួចម្តងម្កាល អាចគ្មានផលអាក្រក់ទេ ។ ប៉ុន្តែការផឹកបន្តិចបន្តួចតែងតែឲ្យមានការផឹកច្រើន ។ នៅប្រទេសជាច្រើនក្នុងពិភពលោក ការផឹកស្រាច្រើន ឬលើសកម្រិត គឺជាមូលហេតុមួយដែលបណ្តាលឲ្យមានបញ្ហាសុខភាពធ្ងន់ធ្ងរជាច្រើន មិនត្រឹមតែចំពោះអ្នកផឹកទេ ថែមទាំងចំពោះអ្នកដែលមិនផឹកទៀត ។ ការប្រមឹកមិនត្រឹមតែធ្វើឲ្យខូចសុខភាពដល់អ្នកផឹកប៉ុណ្ណោះទេ (ដោយសារជំងឺផ្សេងៗ ដូចជាជំងឺក្រិនថ្លើម និងជំងឺរលាកថ្លើម) ប៉ុន្តែវាថែមទាំងប៉ះពាល់ដល់ក្រុមគ្រួសារ និងសហគមន៍តាមរូបភាពជាច្រើន ។ ដោយការបាត់បង់ការវិនិច្ឆ័យក្នុងពេលស្រវឹង និងការបាត់បង់តម្លៃរបស់ខ្លួននៅពេលស្វាងស្រា នាំឲ្យបាត់បង់សុភមង្គល ខ្ជះខ្ជាយ និងអំពើហិង្សា ហើយភាគច្រើនវាប៉ះពាល់ដល់អ្នកដែលជាទីស្រលាញ់បំផុត ។

តើមានឪពុកប៉ុន្មាននាក់បានចំណាយប្រាក់ដែលសល់បន្តិចបន្តួចទៅលើស្រា ក្នុងពេលដែលកូនរបស់ខ្លួនកំពុងឃ្លាន ? តើមានជំងឺប៉ុន្មានដែលកើតឡើងព្រោះតែបុរសម្នាក់ចំណាយប្រាក់ដែលរកបានបន្តិចបន្តួចទៅលើស្រា ជាជាងទៅលើការកែលម្អស្ថានភាពរស់នៅរបស់គ្រួសារ ? តើមានមនុស្សប៉ុន្មាននាក់ ដែលស្អប់ខ្លួនឯងដោយសារខ្លួនបានធ្វើឲ្យអ្នកដែលខ្លួនស្រលាញ់រងទុក្ខ ហើយត្រូវផឹកបន្ថែមដើម្បីបំភ្លេច ?

នៅពេលដែលបុរសម្នាក់យល់ថា ស្រាបំផ្លាញសុខភាព និងសុភមង្គលរបស់អ្នកនៅជុំវិញខ្លួន តើគាត់អាចធ្វើអ្វីខ្លះ? ដំបូងគាត់ត្រូវទទួលស្គាល់ថាការផឹកស្រារបស់គាត់គឺជាបញ្ហា ។ គាត់ត្រូវស្មោះត្រង់ចំពោះខ្លួនឯង និងចំពោះអ្នកដទៃ ។ មនុស្សខ្លះអាចសម្រេចចិត្តបានយ៉ាងងាយថាឈប់ផឹកស្រា ។ ប៉ុន្តែមានករណីជាច្រើនដែលមនុស្សត្រូវការជំនួយ និងការគាំទ្រពីក្រុមគ្រួសារ មិត្តភ្តិ និងអ្នកផ្សេងៗទៀត ដែលយល់ពីការលំបាកក្នុងការបញ្ឈប់ទម្លាប់នេះ ។ អ្នកដែលធ្លាប់ផឹកស្រាច្រើន ហើយអាចឈប់ផឹកបាន តែងតែជាអ្នកដែលសក្តិសមបំផុតក្នុងការជួយអ្នកដទៃឲ្យធ្វើដូចគាត់ដែរ ។

ការផឹកស្រាមិនមែនជាបញ្ហាធំសម្រាប់បុគ្គលនោះទេ តែវាជាបញ្ហាសម្រាប់សហគមន៍ទាំងមូលតែម្តង ។ សហគមន៍ដែលយល់អំពីបញ្ហានេះ អាចជួយបានច្រើនក្នុងការលើកទឹកចិត្តដល់អ្នកដែលមានការតាំងចិត្តធ្វើការផ្លាស់ប្តូរ ។ បើអ្នកបារម្ភណ៍អំពីការផឹកស្រាដ៏លើសលប់នៅក្នុងសហគមន៍របស់អ្នក ជួយរៀបចំការប្រជុំមួយដើម្បីពិភាក្សាអំពីបញ្ហាទាំងនេះហើយសម្រេចថាត្រូវធ្វើសកម្មភាពអ្វីខ្លះ ។

បញ្ហាជាច្រើនអាចដោះស្រាយបាននៅពេលប្រជាជនធ្វើការរួមគ្នា និងជួយគាំទ្រគ្នាទៅវិញទៅមក ។

ការជក់បារី

មានមូលហេតុជាច្រើនដែលថាការជក់បារីមានគ្រោះថ្នាក់ដល់សុខភាពរបស់អ្នកជក់ផ្ទាល់ និងសុខភាពរបស់គ្រួសារ ។

ការជក់បារីបង្កើនការប្រឈមនឹកការកើតជំងឺមហារីកសួត មហារីកមាត់ បំពង់ក និងបបូរមាត់ ។ (បើអ្នកជក់បារីកាន់តែច្រើនឱកាសនៃការស្លាប់ដោយសារជំងឺមហារីក ក៏កាន់តែខ្ពស់) ។
ការជក់បារីនាំឲ្យមានជំងឺសួតធ្ងន់ធ្ងរ រួមមានជំងឺរលាកទងសួតរ៉ាំរ៉ៃ និងជំងឺហើមសួតដោយខ្យល់ (និងមានគ្រោះថ្នាក់ដល់ជីវិតចំពោះអ្នដែលមានជំងឺទាំងនេះស្រាប់ ឬមានជំងឺហឺត) ។
ការជក់បារីអាចបណ្តាលឲ្យដំបៅក្រពះ ឬធ្វើឲ្យជំងឺដំបៅក្រពះកាន់តែធ្ងន់ធ្ងរ ។
ការជក់បារីបង្កើនឱកាសក្នុងការមានជំងឺ ឬស្លាប់ដោយជំងឺបេះដូង ឬជំងឺដាច់សសៃឈាមខួរក្បាល ។
កុមារដែលមានឪពុកម្តាយជាអ្នកជក់បារី មានជំងឺរលាកសួត និងជំងឺផ្លូវដង្ហើមផ្សេងទៀត ញឹកញាប់ជាងកុមារដែលមានឪពុកម្តាយមិនជក់បារី ។
ទារកដែលមាតារបស់ខ្លួនជក់បារីនៅពេលមានផ្ទៃពោះ មានមាឌតូចជាង និងលូតលាស់យឺតជាងទារកដែលមានមាតាមិនជក់បារី ។
ឪពុកម្តាយ គ្រូបង្រៀន បុគ្គលិកសុខាភិបាល និងអ្នកផ្សេងទៀតដែលជក់បារី បានធ្វើជាគំរូមិនល្អដល់កុមារ និងយុវវ័យ ដែលធ្វើឲ្យពួកគេអាចចាប់ផ្តើមជក់បារីដែរ ។
ម្យ៉ាងទៀត ការជក់បារីក៏ធ្វើឲ្យមានការចំណាយប្រាក់ដែរ ។ មើលទៅវាហាក់ដូចជាបន្តិចបន្តួចទេ ប៉ុន្តែនៅពេលបូកបញ្ចូលគ្នា វាគឺជាការចំណាយយ៉ាងច្រើន ។ នៅតាមប្រទេសក្រីក្រ មានប្រជាជនក្រីក្របំផុតជាច្រើន បានចំណាយប្រាក់ទៅលើបារី ច្រើនជាងការចំណាយរបស់ប្រទេសនោះទៅលើកម្មវិធីសុខភាព សម្រាប់មនុស្សម្នាក់ៗទៅទៀត ។

បើប្រាក់ដែលបានចំណាយទៅលើថ្នាំជក់ ត្រូវបានចំណាយទៅលើអាហារ ជំនួសវិញនោះកូនៗ និងគ្រួសារទាំងមូលច្បាស់ជាអាចមានសុខភាពប្រសើរជាងនេះ ។

អ្នកដែលចាប់អារម្មណ៍ទៅលើសុខភាពរបស់អ្នកដទៃ មិនគួរជក់បារីទេ ព្រមទាំងគួរលើកទឹកចិត្តអ្នកដទៃកុំឲ្យជក់បារីផងដែរ ។

ភេសជ្ជៈដែលមានជាតិកាបូណាត (ភេសជ្ជៈដែលគ្មានជាតិស្រវឹង សូដា កូកា ភេសជ្ជៈមានឧស្ម័នកូឡា)

នៅតំបន់មួយចំនួនភេសជ្ជៈទាំងនេះបានទទួលការពេញនិយមយ៉ាងខ្លាំង ។ ជាញឹកញាប់ម្តាយដែលមានជីវភាពក្រីក្រ បានទិញភេសជ្ជៈបែបនេះ ឲ្យកូនដែលមានអាហារូបត្ថម្ភមិនល្អ នៅពេលដែលគេអាចយកប្រាក់ចំនួនដដែលនោះទៅប្រើប្រាស់បានប្រសើរជាងនេះ គឺដោយយកវាទៅវិញស៊ុតបាន២គ្រាប់ ឬអាហារបំប៉ុនរាងកាយផ្សេងទៀត ។

ភេសជ្ជៈជាតិកាបូណាត គ្មានសារជាតិចិញ្ចឹមរាងកាយអ្វីទេ ក្រៅតែពីជាតិស្ករ ។ ហើយសម្រាប់បរិមាណជាតិស្ករ ដែលមានក្នុងនោះវិញ វាមានតម្លៃថ្លៃខ្លាំងណាស់ ។ កុមារដែលផឹកភេសជ្ជៈជាតិកាបូណាត និងភេសជ្ជៈផ្អែមផ្សេងទៀត ច្រើនពេកតែងតែមានធ្មេញប្រហោងនិងពុក តាំងពីអាយុនៅក្មេង ។ ភេសជ្ជៈជាតិកាបូណាត ផ្តល់ផលអាក្រក់ជាពិសេសដល់អ្នកមានជំងឺដំបៅក្រពះ ឬមិនរំលាយអាហារ ។

ភេសជ្ជៈធម្មជាតិដែលធ្វើពីផ្លែឈើ មានប្រយោជន៍ដល់សុខភាពជាង និងភាគច្រើនមានតម្លៃថោកជាងភេសជ្ជៈជាតិកាបូណាត ។

មិនត្រូវទម្លាប់កូនៗរបស់អ្នកឲ្យផឹកភេសជ្ជៈជាតិកាបូណាតទេ ។

ដកស្រង់ចេញពីសៀវភៅទីណាគ្មានវេជ្ជបណ្ឌិតសំរាប់ការថែទាំសុខភាពជនបទ