ជំងឺគ្រុនឈាម

មូសខ្លាភ្នាក់ងារចម្លងជំងឺគ្រុនឈាម

ជំងឺគ្រុនឈាម បង្កឡើងដោយវីរុស (Arbovirus) ដែលត្រូវបានចម្លងដោយមូសខ្លា ។ វាកើតឡើងតាមរដូវកាលនៅក្នុងប្រទេសជាច្រើនក្នុងទ្វីបអាស៊ី និងអាមេរិកខាងត្បូងហើយកើតឡើងយ៉ាងច្រើនក្នុងទ្វីបអាហ្វ្រិក ។ ជាធម្មតា ជំងឺគ្រុនឈាមចាប់ផ្តើមដោយមានគ្រុនក្តៅខ្លាំងភ្លាមៗ ការឈឺចាប់នៅខាងក្រោយភ្នែក និងសីតុណ្ហភាពខ្ពស់បន្តរយៈពេល២-៧ថ្ងៃ ។ កុមារភាគច្រើនបានធូរស្បើយឡើងវិញ ប៉ុន្តែមួយចំនួនតូចកើតមានជាជំងឺធ្ងន់ធ្ងរ ។ ជាញឹកញាប់ ក្នុងអំឡុងធូរស្បើយឡើងវិញ កុមារតែងមានស្នាមកន្ទួលក្រហមលើស្បែក ។

Arbovirus

រោគវិនិច្ឆ័យ

គួរសង្ស័យជំងឺគ្រុនឈាម នៅពេលកុមារមានគ្រុនក្តៅយូរជាង ២ថ្ងៃ ហើយរស់នៅក្នុងតំបន់ដែលប្រឈមនឹងជំងឺគ្រុនឈាម ។

- ឈឺក្បាល ឈឺចាប់ក្រោយភ្នែក ឈឺចាប់តាមសន្លាក់និងសាច់ដុំ ឈឺពោះ ក្អួត និងឬស្នាមអុចៗក្រហមអាចកើតឡើង ប៉ុន្តែមិនមែនកើតឡើងជានិច្ចនោះទេ ។ ការញែកជំងឺគ្រុនឈាម ចេញពីជំងឺដទៃដែលកើតឡើងញឹកញាប់លើកុមារអាចជាការពិបាក ។

ការព្យាបាល

កុមារភាគច្រើន អាចត្រូវបានព្យាបាលនៅផ្ទះ ប្រសិនបើកកុមារនៅមិនឆ្ងាយពីមន្ទីរពេទ្យ ។

- ប្រាប់ឪពុកម្តាយរបស់កុមារឱ្យនាំកូនត្រលប់មកវិញ ដើម្បីតាមដានបន្តរៀងរាល់ថ្ងៃ និងត្រូវត្រលប់មកវិញជាបន្ទាន់ បើមានសញ្ញាណាមួយកើតឡើង ៖ ឈឺពោះជាខ្លាំង ក្អួតជាប់រហូត ចុងដៃចុងជើងត្រជាក់ស្អិត ល្ហិតល្ហៃ ឬឡេះឡះ ចេញឈាម ឧ. លាមកខ្មៅ ឬកម្អួតដូចកាកកាហ្វេ ។

- លើកទឹកចិត្តឲ្យកុមារផឹកទឹកស្អាត ឬទឹកអូរ៉ាលីត ដើម្បីជំនួសជាតិទឹកដែលបាត់បង់ក្នុងពេលគ្រុនក្តៅ និងក្អួត ។

- ផ្តល់ឱសថ Paracetamol បើកុមារមានគ្រុនក្តៅខ្លាំងដែលពិបាកក្នុងខ្លួន ។ មិនត្រូវផ្តល់ឱសថ Aspirin ឬឱសថប្រឆាំងការរលាកដែលគ្មានជាតិស្តេរ៉ូអ៊ីដ (NSAINs) ដូចជា Ibuprofen ទេ ព្រោះឱសថទាំងនេះអាចធ្វើឲ្យចេញឈាមកាន់តែធ្ងន់ធ្ងរ ។

- តាមដានកុមាររៀងរាល់ថ្ងៃ រហូតសីតុណ្ហភាពត្រឡប់មកធម្មតា ។ ពិនិត្យអេម៉ាតូគ្រីត រៀងរាល់ថ្ងៃ បើអាច ។ ពិនិត្យរកសញ្ញានៃជំងឺធ្ងន់ធ្ងរ ។

- អោយសម្រាកពេទ្យ ចំពោះកុមារណាដែលមានសញ្ញានៃជំងឺធ្ងន់ធ្ងរ (ចេញឈាមតាមស្បែក ស្ហុក ស្ថានភាពផ្លូវចិត្តប្រែប្រួល ប្រកាច់ ឬកើតលឿង) ឬមានអេម៉ាតូគ្រីតកើនឡើងរហ័ស ។

ដកស្រង់ពីសៀវភៅហោប៉ៅស្តីពី ការថែទាំព្យាបាលក្នុងមន្ទីរពេទ្យសម្រាប់កុមារ