ការពុលដោយឱសថ Paracetamol

ចំពោះការពុលដោយឱសថ Paracetamol ៖

ប្រសិនបើស្ថិតក្នុងពេល ៤ម៉ោង បន្ទាប់ពីការលេបនៅឡើយ គួរផ្តល់ធ្យូងសកម្មបើមាន ឬជំរុញឲ្យក្អួត លើកលែងតែត្រូវការប្រើឱសថបន្សាបជាតិពុលតាមមាត់ ឬតាមសសៃ (អានផ្នែកខាងក្រោម) ។
សម្រេចចិត្តថា តើត្រូវការប្រើឱសថបន្សាបជាតិពុលឬទេ ដើម្បីបង្ការការខូចថ្លើម ៖ ការលេបចំនួន ១៥០ម.ក្រ/គ.ក ឬច្រើនជាងនេះ កម្រិតពុល ៤ម៉ោង របស់ Paracetamol បើអាចធ្វើបាន ។ ភាគច្រើនគឺកុមារធំដែលត្រូវការប្រើថ្នាំបន្សាបជាតិពុលច្រើនជាង បន្ទាប់ពីលេបឱសថ Paracetamol ដោយខ្លួនឯង ឬនៅពេលដែលឪពុកម្តាយឲ្យថ្នាំលើសដោយអចេតនា ។
ប្រសិនបើក្រោម ៨ម៉ោង បន្ទាប់ពីលេបចូល គួរផ្តល់ឱសថ Methionine តាមមាត់ ឬ Acetylcysteine តាមសសៃឈាម ។ អាចប្រើឱសថ Methionine ប្រសិនបើកុមារមិនសន្លប់ និងមិនក្អួត (<៦ឆ្នាំ ១ក្រ រៀងរាល់៤ម៉ោង ចំនួន៤ដង >៦ឆ្នាំ ២.៥ក្រ រៀងរាល់៤ម៉ោង ចំនួន៤ដង) ។
ឬកុមារមិនអាចលេបថ្នាំតាមមាត់ ចូរផ្តល់ឱសថ Acetylcysteine តាមសសៃឈាម ។ សូមចំណាំថា បរិមាណសេរ៉ូមដែលប្រើក្នុងរបបស្តង់ដារ គឺច្រើនពេកសម្រាប់កុមារតូចៗ ។
ចំពោះកុមារទម្ងន់ <២០គ.ក ចូរផ្តល់កម្រិតថ្នាំដំបូងចំនួន ១៥០ម.ក្រ/គ.ក ក្នុងជាតិស្ករ ៥% ចំនួន ៣ម.ល/គ.ក រយៈបេល១៥នាទី បន្ទាប់មកផ្តល់ ៥០ម.ក្រ/គ.ក ក្នុងជាតិស្ករ ៥% ចំនួន ៧ម.ល/គ.ក រយៈពេល៤ម៉ោង ចុងក្រោយផ្តល់ ១០០ម.ក្រ/គ.ក ក្នុងជាតិស្ករ ៥% ចំនួន ១៤ម.ល/គ.ក រយៈពេល៦ម៉ោង ។ បរិមាណជាតិស្ករអាចបង្កើនចំពោះកុមារធំៗ ។ បន្តការចាក់បញ្ចូលឱសថ Acetylcysteine ច្រើនជាង ២០ម៉ោង ប្រសិនបើកុមារត្រូវបានបញ្ជូនមកយឺតយ៉ាវ ឬមានភស្តុតាងនៃការពុលថ្លើម ។ ប្រសិនបើអាចវាស់អង់ហ្សីមថ្លើម ហើយឃើញថាវាកើនឡើងគួរបន្តការចាក់បញ្ចូលតាមសសៃរហូតកម្រិតអង់ហ្សីមធ្លាក់ចុះ ។

ដកស្រង់ចេញពីសៀវភៅហោប៉ៅស្តីពី ការថែទាំព្យាបាលក្នុងមន្ទីរពេទ្យសម្រាប់កុមារ