ហេតុអ្វីបានជាស្ត្រីគ្មានពុកចង្កា ?

យើងដឹងថា សក់ដ៏ស្រស់ស្អាតរបស់ស្ត្រី គឺជារឿងមួយគួរឲ្យទាក់ទាញខ្លាំងណាស់ ប៉ុន្តែយើងប្រាកដជាសន្និដ្ឋានថា សក់មនុស្សយើង តាមធម្មតាមានតួនាទីសំខាន់ ។ នៅពេលទារកកើតមក ទារកមិនសូវមានសក់ល្អទេ ។ ប្រការនេះ មិនយូរប៉ុន្មាននឹងជំនួសដោយសក់ដែល្អប្រណិត ដែលយើងបានកត់សម្គាល់ឃើញ ចំពោះក្មេងៗទាំងឡាយ ។ បន្ទាប់មកនឹងដល់អាយុគ្រប់ការ ហើយសក់ដ៏ល្អនេះ នឹងផ្លាស់ប្តូរទៅរកសក់មួយ លូតលាស់ជាលើកចុងក្រោយ នៅពេលមនុស្សយើងពេញវ័យ ។

ការលូតលាស់នៃសក់នៅក្នុងភាពជាមនុស្សពេញវ័យនេះ គឺត្រូវគ្រប់គ្រងដោយក្រពេញភេទ ។ អ័រម៉ូនបុរសបានដំណើរការ តាមរបៀបនេះ រហូតដល់ពុកចង្កា និងរោមដងខ្លួនវិវឌ្ឍឡើង ចំណែកឯការដុះសក់នៅលើក្បាលត្រូវផ្អាក ឬក៏លូតលាស់យឺតៗ ។

សកម្មភាពអ័រម៉ូនស្ត្រី គឺផ្ទុយពីរឿងទាំងនេះទាំងស្រុង ។ សក់ក្បាលត្រូវលូតលាស់ ចំណែកឯការលូតលាស់ពុកចង្កា និងរោមដងខ្លួនត្រូវផ្អាក ។ ដូច្នេះ ស្ត្រីគ្មានពុកចង្កាទេ ពីព្រោះក្រពេញ និងអ័រម៉ូននៅក្នុងខ្លួនរបស់ពួកគេផ្សេងគ្នា ហើយមានតួនាទីដោយផ្ទាល់ ដើម្បីទប់ស្កាត់មិនឲ្យលូតលាស់ ។

ដកស្រង់ពីសៀវភៅ ប្រាប់ខ្ញុំមកថា តើហេតុអ្វី? ចេញផ្សាយដោយសៀវភៅបណ្តុះគំនិត ២០១២