ជាទូទៅ ស្ត្រីត្រូវបានលើកទឹកចិត្តអោយសម្រាលបុត្រតាមផ្លូវធម្មជាតិ ព្រោះផលវិបាកនៃការសម្រាលតាមធម្មជាតិ មានតិចតួចជាងការវះកាត់ ។ ករណីក្រុមគ្រូពេទ្យសម្រេចធ្វើការវះកាត់ លុះត្រាតែការសម្រាលតាមធម្មជាតិអាចមានគ្រោះថ្នាក់ចំពោះម្តាយនិងកូន ។ ប៉ុន្តែបច្ចុប្បន្ននេះអត្រានៃការសម្រាលបុត្រដោយវះកាត់ មានការកើនឡើងជាលំដាប់គួរអោយព្រួយបារម្ភ ជាពិសេសការវះកាត់ដោយគ្មានមូលហេតុត្រឹមត្រូវ ។ ស្ត្រីមួយចំនួនយល់ខុសថា ការសម្រាលកូនដោយវះកាត់ មានភាពងាយស្រួល ដោយមិនចាំបាច់ឆ្លងកាត់ការឈឺពោះសម្រាល និងមើលរំលងផលវិបាកផ្សេងៗ ទៅថ្ងៃអនាគត ដែលបណ្តាលមកការវះកាត់នេះ ។ ដូច្នេះតើមានផលវិបាកអ្វីខ្លះអំឡុង និងក្រោយពេលការវះកាត់សម្រាលកូន ?
ផលវិបាកអំឡុងពេលវះកាត់
- ផលវិបាកនៃថ្នាំសណ្តំ (Syndrome de Mendelson)
- ការបាត់បង់ឈាមច្រើនពេលវះកាត់
- ការដាច់រហែកស្បូនខ្លាំង
- របួសប្លោកនោម ឬពោះវៀន ដែលទាមទារការសម្រាកពេទ្យរយៈពេលយូរ
ផលវិបាកក្រោយពេលវះកាត់ភ្លាមៗ ១០% ទៅ៤២%
- ការបង្ករោគផ្សេងៗ មានដូចជា ការរលាកប្លោកនោម រលាកភ្នាសក្នុងរបស់ស្បូន រលាកស្រោមពោះ ឬអាចដល់បង្ករោគក្នុងសសៃឈាម
- ការហូរឈាមក្រោយពេលវះកាត់ មានកកឈាមលើស្នាមរបួសស្បូន ឬក្រោមរបួសស្បែក
- ភាពស្លេកស្លាំង
- ផលវិបាកស្ទះសសៃឈាមតូចៗ ជាពិសេសសសៃឈាមក្នុងសួតធ្វើអោយមានវិបត្តិផ្លូវដង្ហើម
ផលវិបាកក្រោយពេលវះកាត់ នៅពេលមានផ្ទៃពោះលើកក្រោយ ស្ត្រីអាចប្រឈមនឹង
- ការវះកាត់យកកូនសារជាថ្មី
- ការធ្លាយស្បូន
- សុកពាំងមាត់ស្បូន
- សុកចាក់ឬសក្នុងសាច់ស្បូន ឬចាក់ដល់ប្លោកនោម
ផលវិបាកទាំងអស់នេះ មិនសូវកើតមានញឹកញាប់ទេ តែករណីខ្លះអាចគំរាមគំហែងដល់អាយុជីវិតស្ត្រីបាន ។ ដូច្នេះរាល់ការសម្រាលទាំងអស់ ស្ត្រីគួរពិភាក្សាជាមួយគ្រូពេទ្យជំនាញជាមុន ដើម្បីជ្រើសរើសការសម្រាលមួយដ៏សមស្រប និងមានសុវត្ថិភាពទាំងម្តាយ និងកូន ។ វេជ្ជបណ្ឌិតជំនាញផ្នែកសម្ភពនិងរោគស្ត្រី នៃមន្ទីរពេទ្យកាល់ម៉ែតនឹងផ្តល់ដំបូន្មានដ៏ត្រឹមត្រូវជូនលោកអ្នក ក្នុងការជ្រើសរើសវិធីសម្រាលបុត្រ ។
ដកស្រង់ចេញពី Page Calmette Hospital
0 comments:
Post a Comment